六斗橱摆放风水(对着大门摆五斗柜)
阿拉康新小区，有四栋30层高楼组成。紧靠着阿拉的是康寿小区，伊是一个老旧小区，有两栋老式的、六层楼的居民楼，唔没卫生间，因此小区里安排了一座公共厕所。两个小区组成一个居民区，居民将近2000多人。小区的党支部书记姓康，健康的康，单名一个悦，喜悦的悦，大名就叫康悦。
康悦书记五十来岁年纪，中等身材，多年的社区工作，积累了丰富的经验。伊拿小区的老年人、特别是独居老人的情况，掌握得清清爽爽，就像自己屋里的老人。只要空下来，伊就张家阿婆屋里问个长短、李家伯伯屋里看看有啥个需求。每栋楼的门牌位置、地形特点，每个老人的喜怒哀乐、家庭情况，侪了然于心，所以，小区里的居民，特别是老年人，看到伊侪交关亲切。
前一腔，奥密克戎病毒，就像“倒春寒”一样，吹到了号称“魔都”的上海。康新小区也有居民核酸检测出现了阳性。面对着疫情，我伲小区没有后退，而是迎难而上。辣了上级领导的部署下，康悦书记挺身而出，带领社区干部，还有志愿者，一道封小区、清楼道、做核酸、送快递，一步一个脚印，像春风一样温暖着“康新人”的心。
大清早 解难大毛头
每天早浪向，小区厕所间是比较拥挤的。男厕所里一共有六七只坑位，经常性是里向“客满”，厕所间外头还有六七个人排队排了嗨，轮流上厕所。搿日天2号坑老长辰光唔没动静，别的坑位两三批人调过了，就是2号坑一直“摒了海”。有人就寻到了康书记，拿情况搭伊一讲，康书记马上赶过来，去敲2号坑的门。
“里向啥人，我是康悦。”
“里向是我，大毛头。”
大毛头是退休老工人，邻居们侪叫伊小名大毛头；因为老爱人到儿子屋里向帮忙带孙子，所以此地块伊一家头蹲了嗨。
“大毛头，侬胃口蛮好，厕所间里蹲了三刻钟还勿想出来？既然侬介欢喜此地，索性拿户口报到此地么好了。”
因为康书记平常搭大家经常打打嘭、讲讲笑话，大家侪习惯了。
“噢哟康书记，侬勿要打嘭了……”
“葛末，侬想出来伐？”
“想嗰。”
“葛末侬出来！”
“我出勿来。”
“哪能会出勿来？”
“康书记，我老实搭侬交代。阿拉小区勿是封脱了么，阿拉老太婆怕我没得小菜吃，昨天烧了交关菜，叫我儿子送得来。夜里吃饭辰光，看到介许多菜，我胃口老好，刹车刹不住，穷吃了……”
“吃点啥物事？”
“一块大排骨，两只猪脚爪，三只小肉圆，四只大蛋饺，五只小笼包……”
“噢哟大毛头，侬真会吃！好去申报大世界基尼斯记录了。”
“噢哟康书记哎，侬不要讲了；昨日夜里这眼物事侪从我嘴巴里下去了；但是今天出毛病了，昨日上头下去了，今朝下头出不来了。我蹲在这块，三刻钟了，下头堵老了。我用力气硬劲摒，摒不出来。后来我唔没力气了，摒不动了……”
“葛末侬啥体勿叫呢？”
“我不敢叫。我叫‘救命’，110来了，以为是公共厕所出人命了；我叫‘来人’，我又不是当领导的，人家讲起来，侬豁啥个浪头！现在侬来了，救命王‘菩萨’来了，我有救了！”
康书记一听，心里有数了。伊拿居委会干部小张叫过来，搭伊讲，侬到1号302李家伯伯屋里向，五斗橱第二只抽屉里，去拿一只开塞露。倷要讲了，康书记哪能可以随便到人家屋里去拿物事，外加连摆放的部位侪清清爽爽？
我刚刚已经讲过了，由于康书记得到了老年居民的信任，伊拉拿自己屋里的钥匙侪放心地交拨了居委会。
等到小张拿来开塞露，大毛头用了以后，唔没几分钟，下头“道路”打通，涨了肚皮里的“隔夜货”全部撤空。大毛头如释重负，立了起来，“不对了，我两只脚木脱了，没得知觉了。”
康书记拿伊搀出来，“侬是大毛头，还当自己是小毛头，吃起来辰光呒没清头。今朝还要搿能吃伐？”
“康书记，我向侬保证，今朝回去吃泡饭……”
“对了，吃得清淡点，对胃有好处。哎，屋里向吃泡饭的小菜有伐？”
“有，屋里吃泡饭的小菜也老多嗰。”
“屋里还有点啥个菜？”
“喏，小绍兴的白斩鸡、小金陵的盐水鸭、宁波黄泥螺、崇明糟毛蟹”……
“大毛头，侬还有介好胃口？”
“康书记，搭侬打打嘭嗰。”
大毛头开心地笑了起来……
唱双簧 智斗老好婆
刚刚吃过中饭，居委会小张寻到康书记，讲，2号303的苏州好婆掼脱一跤，现在勿好动，担心是骨折。康书记搭伊讲，侬马上准备一部轮椅等了下头，另外请两个男的志愿者上去拿好婆背下来；正好昨日做过核酸检测，好婆是阴性，问题勿大，马上送医院。
过仔一歇，小张回过来，搭书记讲，好婆勿肯下来。哪能一桩事体？原来，前两年好婆的老爱人因为车祸去世，好婆受到刺激，所以脑子有辰光清爽，有辰光糊涂。刚刚两个志愿者要去背伊下来，伊讲：
“我搭我的老爱人结婚之后，从来唔没别的男人碰过我；我搭倷讲，我也是好人家出身，老底子我到医院里向去看病，搭脉的辰光，我手浪向要摆块绢头，医生勒了绢头浪向搭我搭脉。今朝摁笃（你们）男人来背我，我勿去改。”
康书记一听，灵机一动，穿上大白的防护服，带上大口罩，门面浪向再套一只面罩，装扮成医院里向的护工，搭小张咬了咬耳朵，朝好婆屋里去了，小张跟了伊的后头。到了好婆房间里，康书记立了前头，小张贴了康书记的后头，开口讲，“好婆，我是居委会小张，我来背侬下去。”
“哎，那么对哉。小张是女嗰，好婆欢喜嗰。不过，小张，你平常小样来兮，今朝哪亨（怎么）身坯大仔交关？”
“好婆，今朝我穿子防护衣裳，葛咾（所以）人显得模子大了。”
康书记连忙蹲下身体，旁边两个志愿者拿好婆搀起来放到康书记的背浪向，康书记背起好婆朝下头走。
“小张，看勿出，倷的力气大得来，背背我的老太婆一眼也勿吃力。”
康书记一声勿响，一记头拿好婆背到下头，放到手推车浪。
好婆有点勿开心了。
“小张，我搭倷讲闲话，倷啥体勿睬我？阿是嫌我老太婆闲话太多。”
搿个辰光，康书记调转身体，搭好婆讲，“好婆，侬勿晓得，刚刚小张背侬的辰光，伊一口气摒了嗨；假使一开口，气走脱了，伊就呒没力气了，呒没办法拿侬背下来了。”
“噢，看勿出小张还是练气功。”好婆掉过头来对小张，“小张，倷勿要动气；因为倷是练气功个，一动气，功要呒没嗰。下趟，我要呒没人背哉。”
送上门 夜“擒”志愿者
昨日夜里向，几个志愿者辣了小区里向巡逻，突然看见有一个人，辣了翻墙头，准备翻出小区。几个人冲到伊的面前，大喝一声：“侬做啥？下来！”
迭个小青年慢慢交从围墙浪向爬下来。
志愿者以为伊是小偷，要伊老实交代。啥人晓得迭个小青年笑了起来，开口讲：“大哥，现在疫情期间，最难做的就是小偷：你到街上偷吧，街上莫有人，你没处下手；你到人家家里偷吧，家里全是人，莫法下手。谁肯做小偷？”讲得大家侪笑起来了。
经过询问，原来迭个小青年是一个快递小哥，今朝下半日休息，趁迭个机会，伊到小区2号里向同事屋里白相，吃好夜饭想回去，呒没想到小区被封脱了。同事屋里夫妻两家头，带两个小囡，只有10几个平方房子，伊根本呒没办法留下来。想来想去，决定冒险翻墙离开。唔没想到“出师未捷身先死”，墙头呒没翻出去，拨了小区志愿者“俘虏”了。
康书记问伊：“你姓啥、叫啥、哪里人?”
“俺姓姚，叫姚开封，河南开封人。”
“噢，姓姚，叫姚开封？”
“小时候起名字，俺爸说，俺是开封人，名字就叫开封吧。”
“好，这个名字好。姚开封、姚开封，祝愿阿拉小区早点‘要开封’！”
康书记马上搭姚开封所在快递公司联系，了解到小姚辣单位里表现一直蛮好，外加还是共青团员。一个决定辣康书记脑子里形成了。
“小姚，侬现在肯定出不去了。”
“书记，出不去，俺吃啥、干啥、睡哪？”
“这样，你留在我们小区当志愿者，好不好？”
小姚一听：“中！”
康书记讲：“你跟我们志愿者一起。”
“中！”
“我们干什么，你也干什么。”
“中！”
“我们吃什么，你也吃什么。”
“中！”
“晚上……”
“中！”
“哎，我还没有讲什么，你怎么就‘中’了？”
“康书记，俺就一个心愿，跟你们一起干，希望小区早点‘要开封’！”
“对头，这下我给你来一个‘中’！”（秦来来）
